शोले चित्रपट मूळ शेवटासह पुन्हा प्रदर्शित होणार

पणजी : भारतीय चित्रपटसृष्टीतील मैलाचा दगड मानला जाणारा 'शोले' चित्रपट लवकरच त्याच्या मूळ शेवटासह (Original Climax) प्रेक्षकांच्या भेटीला येणार आहे. हा चित्रपट प्रदर्शित झाला तेव्हा देशात आणीबाणी लागू होती. त्यामुळे सरकारी अधिकाऱ्यांच्या दबावाखातर चित्रपटाचा शेवट बदलावा लागला होता. मात्र आता इतक्या वर्षांनी प्रेक्षकांना दिग्दर्शकाला अपेक्षित असलेला खरा शेवट पाहता येणार आहे, अशी माहिती ज्येष्ठ दिग्दर्शक रमेश सिप्पी यांनी दिली.

इफ्फी महोत्सवातील 'इन कॉन्व्हर्सेशन विथ' या सत्रात किरण सिप्पी यांनी रमेश सिप्पी यांची मुलाखत घेतली. यावेळी सिप्पी यांनी हा किस्सा उलगडला. आता हा चित्रपट 'रिस्टोअर' करण्यात येत असून सेन्सॉर बोर्डाची परवानगी घेऊन तो मूळ शेवटासह प्रदर्शित केला जाईल. "माझा चित्रपट मला हवा तसा प्रदर्शित होतोय याचा मला आनंद आहे," असे सिप्पी यांनी सांगितले.

कॅमेरामन निवडीचा किस्सा
चित्रपटासाठी आधी कॅमेरामन म्हणून के. वैकुंठ यांना निवडण्यात आले होते. मात्र ते अन्य कामात व्यस्त असल्याने द्वारका दिवेचा यांना संधी देण्यात आली. यामुळे वैकुंठ काही काळ नाराज होते, पण नंतर आमची पुन्हा मैत्री झाली अशी आठवणही सिप्पी यांनी सांगितली.