घरट्यासह पिल्ले आगीच्या भक्ष्यस्थानी; चिमणीची सैरभैर अवस्था पाहवेना..!

काणकोण : येथील पालिका बाजार संकुलाजवळ एका अज्ञाताने लावलेल्या कचऱ्याच्या आगीत झाडावरील घरट्यासह चिमणीची निष्पाप पिल्ले होरपळून मरण्याची घटना घडली आहे. मानवाच्या निष्काळजीपणामुळे निसर्गातील एका जीवाचे नुकसान झाले असून, आपल्या मृत पिल्लांच्या शोधात सैरभैर झालेली माता चिमणी अजूनही या परिसरात चिवचिवाट करत फिरत असल्याचे स्थानिकांनी सांगितले.

चावडी-काणकोण येथील नगरपालिका बाजार संकुलाजवळील कुंपणाबाहेर असलेल्या झाडावर एका पक्ष्याने घरटे बांधले होते. त्यात अंडी घालण्यात आली होती आणि काही दिवसांपूर्वीच त्या अंड्यांमधून पिल्ले बाहेर आली होती.

स्थानिक विक्रेत्यांच्या माहितीनुसार, ती पिल्ले रोज घरट्यात चिवचिवाट करत असत आणि त्यांची आई परिसरातून अन्न आणून त्यांना भरवत होती.

एका दिवशी झाडाच्या मुळाशी असलेल्या प्लास्टिक कचऱ्याला अज्ञात व्यक्तीने आग लावल्याचे सांगितले जात आहे. ही आग इतकी वेगाने पसरली की संपूर्ण झाड आगीच्या विळख्यात सापडले.

घरट्यातील पिल्ले अजून उडण्याइतकी मोठी नसल्याने त्यांना बचाव करता आला नाही आणि ती घरट्यातच मृत्युमुखी पडली.

या घटनेनंतरही माता चिमणी दररोज त्या परिसरात येत असल्याचे स्थानिकांचे निरीक्षण आहे. ती वारंवार झाडांवर बसून आपल्या पिल्लांचा शोध घेत असल्याचे पाहायला मिळत आहे.

उघड्यावर कचरा जाळणे, विशेषतः झाडे आणि पक्ष्यांच्या अधिवासाजवळ, अनेकदा अशा अनपेक्षित परिणामांना कारणीभूत ठरू शकते. स्थानिक विक्रेत्यांनीही अशा प्रकारांबाबत अधिक जागरूकता आवश्यक असल्याचे मत व्यक्त केले.