शिंपल्या काढण्यासाठी नदीत गेलेल्या एकाच कुटुंबातील ८ जणांचा मृत्यू

जोयडा : उत्तर कन्नड जिल्ह्यातील भटकळ तालुक्यातील तट्टे हक्कळू नदीत रविवारी शिंपले गोळा करण्यासाठी गेलेल्या १३ जणांच्या गटावर दुर्दैवी प्रसंग ओढवला. पाण्यात बुडून आठ जणांचा मृत्यू झाला असून मृतांमध्ये बहुतांश महिलांचा समावेश आहे. प्राथमिक माहितीनुसार, हे सर्वजण एकाच कुटुंबातील असल्याचे सांगण्यात आले आहे.

मृतांची नावे लक्ष्मी महादेव नाईक (३८), लक्ष्मी नाईक, लक्ष्मी शिवराम नाईक (३९), उमेश मंजुनाथ नाईक (४२), मास्तम्मा मंजुनाथ नाईक (४३), लक्ष्मी अण्णप्पा नाईक (४४), ज्योती नागप्पा नाईक (३७) आणि मालती जट्टप्पा नाईक (३८) अशी आहेत.

हे सर्व मृत पडुशिराळी गावातील रहिवासी असल्याची माहिती समोर आली आहे.

घटनेनंतर स्थानिक नागरिकांनी तात्काळ घटनास्थळी धाव घेत बचावकार्य सुरू केले. या प्रयत्नांत दोन जणांना गंभीर अवस्थेत बाहेर काढण्यात यश आले असून त्यांच्यावर सध्या उडुपी येथील रुग्णालयात उपचार सुरू आहेत.

उर्वरित तीन बेपत्ता नागरिकांचा शोध पोलीस, अग्निशमन दल आणि स्थानिक ग्रामस्थांच्या संयुक्त प्रयत्नांतून सुरू आहे.

घटनेनंतर सर्व मृतांचे पार्थिव भटकळ येथील सरकारी रुग्णालयात हलविण्यात आले. नातेवाईकांचा आक्रोश आणि गावातील शोकमय वातावरणामुळे संपूर्ण परिसर हळहळ व्यक्त करत आहे.