लोटलीतील जहाज बांधणी प्रकल्पात स्फोट; दोघांचा मृत्यू

विजय मरीन जहाज बांधणी प्रकल्पातील आगीच्या भक्ष्यस्थानी पडलेली बोट. 

प्रतिनिधी । गोवन वार्ता
मडगाव : लोटली येथील जहाज बांधणी प्रकल्पात शुक्रवारी भीषण स्फोट झाला. यात दोघा कामगारांचा मृत्यू झाला असून चार जण गंभीर जखमी झाले आहेत. त्यांच्यावर गोमेकॉत उपचार सुरू आहेत. एकावर दक्षिण गोवा जिल्हा इस्पितळात उपचार सुरू आहेत. या प्रकरणी मायणा-कुडतरी पोलिसांनी गुन्हा नोंद करून तपास सुरू केला आहे.

रासई-लोटली येथील विजय मरीन जहाज बांधणी प्रकल्पात बोट तयार करण्याचे काम सुरू असताना शुक्रवारी सायं. ५.१५ वा. स्फोट झाला. यात सात कामगार जखमी झाले. त्यातील दोघांचा जास्त भाजल्याने उपचारादरम्यान मृत्यू झाला. चार कामगारांवर गोमेकॉत उपचार सुरू आहेत. दरम्यान त्यातील दोघांची स्थिती नाजूक आहे. एका कामगारावर मडगाव येथील दक्षिण गोवा जिल्हा इस्पितळात उपचार सुरू आहेत. सर्व कामगार अलिबाग (उत्तरप्रदेश) येथील असून सध्या वेर्णा येथे रहात होते. नवीन जहाज बांधणीचे काम सुरू होते. बंद टँकमध्ये सहा कामगार काम करत होते. एक कामगार टँकच्या बाहेर होता. अचानक टँकला आग लागून स्फोट झाला.

घटनेची माहिती मिळताच वेर्णा अग्निशामक दल, मायणा-कुडतरी पोलीस निरीक्षक अरुण गावस देसाई पथकासह, दक्षिण गोवा आपत्कालीन सेवा पथकाचे उपजिल्हाधिकारी वैल्टन टेलीस, मामलेदार, तसेच जिल्हाधिकारी कार्यालयातील इतर अधिकारी, विजय मरीनचे मालक, फॅक्टरी आणि बॉयलर विभागाचे अधिकारी हे घटनास्थळी दाखल झाले. वेल्डिंगवेळी स्पार्किंग झाल्याने आग लागल्याची शक्यता व्यक्त होत आहे. या प्रकरणी जिल्हाधिकारी कार्यालयाने अहवाल मागवला आहे. त्यानंतर स्फोटामागील कारण स्पष्ट होणार आहे.
चौघा जखमींवर गोमेकॉत उपचार
रात्री उशिरापर्यंत मृत्यू पावलेल्या दोघांची नावे पोलिसांना मिळाली नव्हती. मोहम्मद बाबूल (२५), संतोष कुमार (२५), मनीष चव्हाण (२६) आणि अभिषेक सिंग (२५ सर्व रा. अलिबाग, उत्तरप्रदेश) यांच्यावर गोमेकॉत उपचार सुरू आहेत. तर एका कामगारावर मडगाव येथील दक्षिण गोवा जिल्हा इस्पितळात उपचार सुरू आहेत. घटनेवेळी तो टॅँकच्या बाहेर होता. त्यामुळे त्याला जास्त दुखापत झाली नसल्याची माहिती समोर आली आहे.
सुरक्षा अधिकाऱ्यांचा हलगर्जीपणा नडला
या प्रकरणी मायणा-कुडतरीचे साहाय्यक पोलीस उपनिरीक्षक सुरेश वेळीप यांनी तक्रार दाखल केली आहे. त्यानुसार, विजय मरीन वर्कशाॅपचे सुरक्षा अधिकारी राजू बोरा (मूळ रा. आसाम) यांनी कामगारांना संरक्षणात्मक उपकरणे पुरवण्यात हलगर्जीपणा केला. तसेच अग्निसुरक्षा उपाययोजना करण्यात अयशस्वी झाल्यामुळे कामगारांच्या सुरक्षिततेला धोका निर्माण झाला. परिणामी आग लागून स्फोट झाल्याचे म्हटले आहे. या प्रकरणी निरीक्षक अरुण गावस देसाई यांच्या मार्गदर्शनाखाली उपनिरीक्षक सागर कामत पुढील तपास करत आहे.