श्रीनिवास धेंपो : सभेसाठी १२ हजार लोकांची आसनव्यवस्था
पत्रकार परिषदेत माहिती देताना मठ केंद्रीय समितीचे अध्यक्ष श्रीनिवास धेंपो. सोबत सार्वजनिक बांधकाम मंत्री दिगंबर कामत, अनिल पै, प्रवास नाईक आणि शिवानंद साळगावकर.
..
प्रतिनिधी। गोवन वार्ता
पणजी : श्री संस्थान गोकर्ण पर्तगाळ जीवोत्तम मठाच्या ५५० व्या वर्षपूर्तीनिमित्त (सार्ध पंचशतमहोत्सव) शुक्रवार, २८ नोव्हेंबर रोजी पर्तगाळ येथे पंतप्रधान नरेंद्र मोदी यांच्या हस्ते दक्षिण आशियातील सर्वांत मोठ्या श्रीरामाच्या पुतळ्याचे अनावरण करण्यात येणार आहे, अशी माहिती मठ केंद्रीय समितीचे अध्यक्ष श्रीनिवास धेंपो यांनी दिली. बुधवारी पणजीत झालेल्या पत्रकार परिषदेत ते बोलत होते. यावेळी सार्वजनिक बांधकाम मंत्री दिगंबर कामत, अनिल पै, प्रवास नाईक आणि शिवानंद साळगावकर उपस्थित होते.
धेंपो यांनी सांगितले की, प्रभू श्रीरामाचा कांस्य धातूचा पुतळा ७७ फूट उंच असून तो तमिळनाडू येथील शिल्पकाराने बनवला आहे. अनावरण सोहळ्यानंतर पंतप्रधान मोदी देवदर्शन करतील. त्यानंतर येथे सभा कार्यक्रम होणार आहे. या कार्यक्रमासाठी १२ हजार लोकांची आसनव्यवस्था करण्यात आली आहे. उद्घाटन सोहळ्यानंतर टपाल खात्यातर्फे काढण्यात आलेल्या विशेष तिकिटाचे व अर्थ खात्यातर्फे काढण्यात आलेल्या विशेष नाण्याचे लोकार्पण होईल. २७ नोव्हेंबर ते ७ डिसेंबर दरम्यान विविध धार्मिक, सांस्कृतिक, सामाजिक कार्यक्रमांचे आयोजन करण्यात आले आहे.
या कार्यक्रमात प्रत्येक दिवशी १० हजार, तर दहा दिवसात साधारपणे १.५ लाख लोक भेट देतील, अशी अपेक्षा आहे. याचा विचार करून येथे आवश्यक पायाभूत सुविधा उभारण्यात आल्या आहेत. सांस्कृतिक कार्यक्रमात स्थानिकांसह देशभरातील सुप्रसिद्ध कलाकार आपली कला सादर करतील. यामध्ये अनुप जलोटा, शंकर महादेवन, अमृता शेनोय, महेश काळे, भालचंद्र प्रभू, विश्वजीत बोरवणकर, निलाध्री कुमार आदींचा समावेश आहे. गोमंतकीयांनी या कार्यक्रमांचा लाभ घ्यावा, असे आवाहन धेंपो यांनी केले.
पर्तगाळी मठाचा पर्यटकांनीही अनुभव घ्यावा : दिगंबर कामत
मंत्री दिगंबर कामत म्हणाले की, मठ ५५० वर्षे पूर्ण करत आहे, ही खूप महत्त्वाची घटना आहे. हा मठ समस्त गोमंतकीयांचा अभिमान आहे. कार्यक्रमातील एक भाग म्हणून ५५० कोटी राम नाम जपण्याचा कार्यक्रम आयोजित केला होता. यासाठी देशभरात विविध केंद्र स्थापन करण्यात आली होती. जपाच्या कार्यक्रमाला गोव्यासह देशभरातून चांगला प्रतिसाद मिळाला. पर्तगाळ येथे दहा दिवसांत ५५० हवन केले जाणार आहेत. केंद्र सरकार पर्यटनाला चालना देत आहे. पर्तगाळी मठाचा पर्यटकांनीही अनुभव घ्यावा.
लवकरच रामायणावर आधारित ‘थीम पार्क’
मठ परिसरात पुढील दोन महिन्यांत रामायणावर आधारित ‘थीम पार्क’, १० हजार चौ.मी. जागेत म्युझियम, प्रकाश आणि ध्वनी शो आदी सुरू केले जाणार आहेत. यामुळे हा मठ पर्यटनासाठीदेखील आकर्षण बनेल. हा परिसर अाध्यात्मिक केंद्र बनवण्यासाठी आमचे प्रयत्न आहेत, असे श्रीनिवास धेंपो यांनी सांगितले.
शुक्रवारी काणकोणमधील शाळांना सुट्टी
पंतप्रधान नरेंद्र मोदी शुक्रवार, २८ नोव्हेंबरला पर्तगाळी येथे येणार असल्याने त्यांच्या सुरक्षिततेच्या व वाहतूक व्यवस्थेच्या दृष्टीने काणकोणमधील सरकारी व खासगी प्राथमिक, माध्यमिक, उच्च माध्यमिक, खास विद्यार्थ्यांची शाळा यांना सुट्टी देण्याचा आदेश शिक्षण संचालक शैलेश झिंगडे यांनी काढला आहे.
