सांख्यिकी खात्याचा अहवाल : धारबांदोड्यात फक्त १.०७ टक्के महिला कर्मचारी
प्रतिनिधी। गोवन वार्ता
पणजी : राज्यात ३१ मार्च २०२४ अखेरीस २३ हजार ९९८ महिला सरकारी कर्मचारी होत्या. तालुकानिहाय पाहता यातील सर्वाधिक ४,५९१ महिला कर्मचारी (१९.१० टक्के) या सासष्टी तालुक्यातील विविध कार्यालयांत कार्यरत होत्या. धारबांदोडा तालुक्यातील कार्यालयांत सर्वांत कमी म्हणजेच २५९ (१.०७ टक्के) महिला कर्मचारी काम करत होत्या. सांख्यिकी खात्याच्या अहवालातून ही माहिती मिळाली आहे. यामध्ये सरकारी खाती, स्वायत्त संस्था, अनुदानित संस्था आणि सार्वजनिक क्षेत्रातील उपक्रमांत काम करणाऱ्या कर्मचाऱ्यांचा समावेश करण्यात आला होता.
अहवालानुसार, एकूण महिला सरकारी कर्मचाऱ्यांपैकी बार्देश तालुक्यात ४,१०२ (१७.०९ टक्के) महिला कर्मचारी काम करत होत्या. तिसवाडी तालुक्यात ३,९१६ (१६.३१ टक्के), फोंडा तालुक्यात २,९६२ (१२.३४ टक्के), डिचोली तालुक्यात १,७२५ (७.१८ टक्के), सत्तरीमध्ये १,४२९ (५.९५ टक्के), पेडणेमध्ये १,३१६ (५.४८ टक्के), मुरगावमध्ये १,२६६ (५.२७ टक्के), केपेमध्ये १,२४३ (५.१७ टक्के), काणकोणमध्ये ७२८ (३ टक्के), तर सांगेमध्ये ४३४ (१.८० टक्के) महिला कर्मचारी काम करत होत्या.
स्वायत्त संस्था, अनुदानित संस्था आणि सार्वजनिक क्षेत्रातील उपक्रम वगळून केवळ सरकारी खात्यांचा विचार केल्यास एकूण १३ हजार ६९९ महिला कर्मचारी होत्या. यामध्ये तिसवाडी तालुक्यात सर्वाधिक २,२४६ महिला कर्मचारी होत्या. यानंतर बार्देशमध्ये २,०८७, सासष्टीमध्ये २,०७६ महिला कर्मचारी होत्या. धारबांदोडा, सांगे, काणकोण आणि केपे तालुक्यांतील सरकारी खात्याच्या कार्यालयांत काम करणाऱ्या महिला कर्मचाऱ्यांची संख्या तुलनेने कमी असल्याचे अहवालात नमूद केले आहे.
डिचोली, सत्तरीमधील महिला कर्मचाऱ्यांत वाढ
राज्यात २०१९ च्या तुलनेत २०२४ मध्ये डिचोली, सत्तरी, फोंडा, धारबांदोडा, सांगे, काणकोण केपे या तालुक्यांतील सरकारी खात्यांच्या कार्यालयांत काम करणाऱ्या महिला कर्मचाऱ्यांची संख्या वाढली आहे. सासष्टी, तिसवाडी आणि बार्देश तालुक्यांत काम करणाऱ्या महिला कर्मचाऱ्यांची संख्या कमी झाली आहे.
८६ टक्के महिला कर्मचारी कायम
३१ मार्च २०२४ अखेरीस राज्यातील एकूण महिला सरकारी कर्मचाऱ्यांपैकी २० हजार ६३० (८६ टक्के) कर्मचारी कायम स्वरूपात नोकरीवर होत्या. यामध्ये सरकारी खात्यातील १२ हजार ४४९, अनुदानित संस्थांतील ७८४६, स्वायत्त संस्थातील ३३९, तर सार्वजनिक क्षेत्रातील उपक्रमांतील २९६ महिला कर्मचाऱ्यांचा समावेश होता.
