मुख्य निवडणूक अधिकारी : एसआयआरचे काम वेगाने; २.२० लाख मतदारांचा सुनावणीनंतर निर्णय
पत्रकारांशी बोलताना मुख्य निवडणूक अधिकारी संजय गोयल.
प्रतिनिधी। गोवन वार्ता
पणजी : राज्यातील मतदारांच्या विशेष सखोल फेरतपासणी (एसआयआर) अंतर्गत आतापर्यंत १०.५५ लाख (९६.५ टक्के) मतदारांचे एन्युमरेशन फॉर्म संकलित झाले आहेत. सुमारे ९० हजार मतदारांचे फॉर्म परत आलेले नाहीत. अशा मतदारांची नावे मसुदा यादीत येणार नाहीत. सुमारे २.२० लाख मतदारांचे अथवा त्यांच्या आई-वडिलांचे नाव २००२ च्या मतदार यादीत नाही. अशा मॅपिंग न झालेल्या मतदारांबाबत सुनावणी घेऊन अंतिम निर्णय घेण्यात येईल, अशी माहिती मुख्य निवडणूक अधिकारी संजय गोयल यांनी दिली.
रविवारी पणजीत झालेल्या पत्रकार परिषदेत गोयल यांनी सांगितले की, फॉर्म परत न आलेल्या ९० हजार मतदारांचा एएसडीडी या श्रेणीत समावेश केला आहे. यामध्ये मृत, अनुपस्थित, दुहेरी नाव असणे अथवा पत्ता बदलला असलेल्यांचा समावेश आहे. ९ डिसेंबरला जारी होणाऱ्या मसुदा यादीत यांचे नाव असणार नाही. अशा मतदारांची नावे ऑनलाईन व ऑफलाईन पद्धतीने जाहीर केली जातील. यातील कुणाला आपले नाव चुकीच्या पद्धतीने काढले असे वाटल्यास त्यांनी ७ फेब्रुवारीच्या पूर्वी ‘अर्ज ६’ भरून देणे गरजेचे आहे.
अशा व्यक्तींना घोषणापत्रही द्यावे लागेल. सर्व कागदपत्रे योग्य असतील तर या व्यक्तींची नावे अंतिम मतदार यादीत घेतली जातील. राज्यात याआधी २००२ मध्ये एसआयआर झाले होते. २००२ आणि २०२५ च्या मतदार यादींची पडताळणी केली असता सुमारे २.२० लाख मतदारांचे मॅपिंग झाले नाही. याचाच अर्थ २.२० लाख मतदारांचे अथवा त्यांच्या आई अथवा वडिलांचे नाव २००२ च्या मतदार यादीत नाही. या सर्व लोकांचे नाव मसुदा यादीत येईल. मात्र त्यांना नोटीस पाठवण्यात येतील. त्यांना आपले नाव पूर्वी होते हे सिद्ध करावे लागेल. यासाठी सुनावणी घेऊन अंतिम निर्णय घेतला जाईल.
जिल्हा पंचायत निवडणुकांमध्ये मतदान करता येणार
गोयल यांनी स्पष्ट केले की, मॅपिंग झाले नसले तरी २.२० लाख मतदारांना जिल्हा पंचायत निवडणुकीत मतदान करता येणार आहे. मात्र यासाठी त्यांचे नाव जिल्हा पंचायतीच्या मतदार यादीत असणे आवश्यक आहे.
एकापेक्षा अधिक मतदारयादीत नाव असल्यास शिक्षा
गोव्यातील एसआयआरमध्ये एकदा नाव मॅप झाल्यास त्या मतदाराचे नाव अन्यत्र कोणत्याही मतदार यादीत येणार नाही. महाराष्ट्र, कर्नाटकमध्ये एसआयआर सुरू झाल्यावर गोव्यात मॅप झालेले नाव आपोआप वगळले जाईल. कायद्यानुसार एकापेक्षा अधिक मतदार यादीत नाव असणे हा गुन्हा असून याला एक वर्षापर्यंतची शिक्षा असल्याचे गोयल यांनी स्पष्ट केले.
एसआयआरची स्थिती
राज्यातील एकूण ११.८५ लाख मतदारांपैकी १०.५५ लाख जणांची एन्युमरेशन फॉर्म संकलित झाले आहेत. यातील २.२० लाख जणांचे मॅपिंग झाले नाही. फेरतपासणीत सुमारे ९० हजार एएसडीडी मतदार आढळले. यात २३ हजार ८०० मृत, ३५ हजार ७०० जणांचा पत्ता बदलला, २३ हजार ८०० जण फेरतपासणी वेळी अनुपस्थित होते तर १,७८७ जणांचे दुहेरी मतदान आढळले.
राजकीय पक्षांचे सहकार्य
गोयल यांनी सांगितले की, एसआयआरसाठी सर्व बीएलओनी चांगले काम केले आहे. काही ठिकाणी बीएलओ दोन ते तीन वेळा जाऊन आले आहेत. ही प्रक्रिया ४ नोव्हेंबर रोजी सुरू झाली होती. सुरुवातीला आमच्याकडे काही तक्रारी आल्या होत्या. मात्र त्या त्वरित सोडवण्यात आल्या. या प्रक्रियेते आम्हाला सर्व राजकीय पक्षांनी चांगले सहकार्य दिले.
शंका राहू नये यासाठीच एसआयआर
दुहेरी मतदार ओळखण्यासाठी निवडणूक आयोगाकडे डी डूप्लिकेशन सॉफ्टवेअर आहे. या सॉफ्टवेअरद्वारे मतदाराचे छायाचित्र अथवा डेमोग्राफी डेटानुसार एकसारख्या मतदाराचे नाव सर्व राज्यांना पाठवले जाऊन ते वगळण्यात येत होते. अथवा कुणी तक्रार केल्यास दुहेरी नावे काढून टाकण्यात येत होते. आतापर्यंत हीच प्रक्रिया वापरली जात होती. मात्र तरीही यामध्ये काही शंका नको यासाठी विशेष सखोल फेरतपासणी (एसआयआर) सुरू करण्यात आली आहे. राज्यात ही प्रक्रिया राबवल्यानेच आतापर्यंत ९० हजार एएसडीडी, तर २.२० लाख मॅपिंग न झालेले मतदार आढळले आहेत.
