राज्यात पारा पुन्हा घसरला

पणजी : मागील काही दिवस राज्यात थंडी वाढली आहे. ग्रामीण भागात थंडीची तीव्रता अधिक जाणवत आहे. चोवीस तासांत पणजी येथील किमान तापमान १.६ अंशाने कमी होऊन १९ अंश सेल्सिअस झाले. मुरगावमधील कमाल तापमान २०.६ अंश सेल्सिअस राहीले. पुढील सहा दिवस राज्यातील किमान तापमान १९ ते २० अंश सेल्सिअस पर्यंत पोहोचण्याची शक्यता आहे. यादरम्यान पहाटे मध्यम स्वरूपाचे धुके पडण्याची शक्यता आहे.
राज्यात रात्री आणि पहाटे तीव्र थंडी जाणवत आहे. पहाटे अनेक ठिकाणे धुके पडत आहे. सकाळी थंडीसह गार वाऱ्याची झुळूक अनुभवायला येत आहे. असे असले तरी दुपार नंतर उन्हाची तीव्रता वाढत आहे. रविवारी पणजीत कमाल ३२ अंश तर मुरगावमध्ये ३२.६ अंश सेल्सिअस तापमानाची नोंद झाली. पुढील सहा दिवस राज्यातील कमाल तापमान ३२ ते ३३ अंश सेल्सिअस दरम्यान राहण्याची शक्यता आहे.
याआधी १७ नोव्हेंबर रोजी पणजीत हंगामातील निचांकी म्हणजेच किमान १९ अंश सेल्सिअस तापमानाची नोंद होती. तर १८ नोव्हेंबर रोजी १९.२ अंश, ११ नोव्हेंबर रोजी २०.२ अंश, १२ रोजी २०.६ अंश सेल्सिअस तापमानाची नोंद झाली होती. राज्यात नोव्हेंबर महिन्यातील किमान तापमान साधारपणे २१ ते २२ अंशांदरम्यान असते. राज्यात मागील काही वर्षात नोव्हेंबर महिन्याच्या शेवटच्या तर डिसेंबर महिन्याच्या पहिल्या आठवड्यात थंडीची तीव्रता वाढत आहे.
मात्र जानेवारीनंतर थंडीची तीव्रता कमी होत आहे. याआधी हवामान खात्याने नोव्हेंबर महिन्यात राज्यातील किमान तापमान सरासरी पेक्षा अधिक राहण्याची शक्यता व्यक्त केली होती. असे असले तरी मागील १५ दिवसात किमान तापमान सरासरी पेक्षा १.५ ते २.८ अंशाने कमी झाले होते. खात्याने १ ते ३ डिसेंबर दरम्यान मध्य प्रदेश, महाराष्ट्र, पंजाब येथील काही भागात थंडीच्या लाटेची शक्यता व्यक्त केली आहे.