रेश्मा बांदोडकर उत्तर गोवा, सिद्धार्थ गावस देसाई दक्षिण झेडपीचे अध्यक्ष

पणजी : उत्तर आणि दक्षिण गोवा जिल्हा पंचायत अध्यक्ष व उपाध्यक्षपदासाठी भाजपने आपल्या उमेदवारांची घोषणा रविवारी केली. भाजप प्रदेशाध्यक्ष दामू नाईक यांनी या नावांची अधिकृत घोषणा केली. उत्तर गोवा जिल्हा पंचायत अध्यक्षपदी रेश्मा बांदोडकर आणि उपाध्यक्षपदी नामदेव च्यारी, तर दक्षिण गोवा अध्यक्षपदी सिद्धार्थ गावस देसाई आणि उपाध्यक्षपदी अंजली वेळीप यांची नावे निश्चित झाली. विशेष म्हणजे, ‘गोवन वार्ता’ने याबाबतचे वृत्त सर्वात आधी दिले होते.

भाजपचे अधिकृत उमेदवार

उत्तर गोव्यात महिला आरक्षण

उत्तर गोवा जिल्हा पंचायत अध्यक्षपद आणि दक्षिण गोवा उपाध्यक्षपद महिलांसाठी राखीव करण्यात आले होते. उत्तर गोव्यातून भाजप-मगो युतीच्या ५ महिला सदस्य निवडून आल्या. त्यापैकी रेईश-मागुश मतदारसंघातून निवडून आलेल्या रेश्मा बांदोडकर यांची अध्यक्षपदासाठी निवड झाली. त्या माजी जिल्हा पंचायत सदस्य संदीप बांदोडकर यांच्या पत्नी असून त्यांनी यापूर्वी सरपंच तसेच पंच म्हणूनही काम पाहिले. हा मतदारसंघ महिलांसाठी राखीव झाल्याने संदीप बांदोडकर यांच्या जागी पक्षाने रेश्मा यांना उमेदवारी दिली होती. तसेच उत्तर गोवा उपाध्यक्षपदी होंडा मतदारसंघातील नामदेव च्यारी यांचे नाव जाहीर करण्यात आले.

दक्षिणेत देसाई अन् अंजली वेळीप

दक्षिण गोव्यातील शेल्डे मतदारसंघातील विद्यमान सदस्य सिद्धार्थ गावस देसाई हे दुसऱ्यांदा भाजपच्या तिकिटावर निवडून आले असून त्यांच्याकडे दक्षिण गोवा जिल्हा पंचायत अध्यक्षपदाची धुरा सोपवण्यात आली. तर दक्षिण गोव्यातून बार्से मतदारसंघातून निवडून आलेल्या अंजली वेळीप यांचे नाव उपाध्यक्षपदासाठी पक्षाने जाहीर केले. उत्तर आणि दक्षिण दोन्ही जागी भाजपचाच अध्यक्ष आणि उपाध्यक्ष असणार, असे वृत्त दोन्ही अध्यक्षांच्या नावासह ‘गोवन वार्ता’ने दिले होते, त्यावर आता शिक्कामोर्तब झाले.

आज अर्ज भरण्याची प्रक्रिया

• अतिरिक्त पंचायत संचालकांनी निवडणूक कार्यक्रम जाहीर केला असून, त्यानुसार सोमवार, दिनांक २९ डिसेंबर रोजी अध्यक्ष आणि उपाध्यक्षपदासाठी अर्ज भरण्यात येतील.
• हे अर्ज सकाळी १०.१५ ते दुपारी १२.०० या वेळेत सादर करणे आवश्यक आहे. निर्धारित वेळेनंतर आलेले अर्ज थेट फेटाळले जातील.
• उत्तर गोव्याचे अर्ज पणजीतील गोमंतक मराठा भवन (तिसरा मजला) येथील जिल्हा पंचायत कार्यालयात आणि दक्षिण गोव्याचे अर्ज मडगाव येथील जुन्या कलेक्टर ऑफिसमधील (म्युन्सिपल गार्डनसमोर) जिल्हा पंचायत कार्यालयात स्वीकारले जातील.

३० डिसेंबरला अधिकृत निवड

एकापेक्षा अधिक अर्ज न आल्यास ३० डिसेंबर (मंगळवार) रोजी नावे अधिकृतपणे जाहीर करण्यात येतील. त्यानंतर नवनिर्वाचित सदस्यांचा शपथविधी सोहळा ३१ डिसेंबर २०२५ रोजी सकाळी १०.३० वाजता पर्वरी येथील सचिवालयाच्या सेमिनार हॉलमध्ये पार पडेल. यासंदर्भात पंचायत संचालक महादेव आरोंदेकर यांनी सदस्यांना पत्राद्वारे कळवले आहे.