इस्रायल-अमेरिका हल्ल्यानंतर नेतृत्व बदलले!
तेहरान: इस्रायल आणि अमेरिकेने केलेल्या भीषण हवाई हल्ल्यात इराणचे सर्वोच्च नेते आयतुल्ला अली खामेनेई यांचा मृत्यू झाल्यानंतर निर्माण झालेली राजकीय पोकळी भरून काढण्यासाठी इराणने मोठे पाऊल उचलले आहे. खामेनेई यांच्यानंतर त्यांचे पुत्र मोजतबा हे गादी सांभाळणार असल्याच्या चर्चांना पूर्णविराम मिळाला असून, ज्येष्ठ धर्मगुरु आयतुल्ला अलीरेझा अराफी यांची देशाचे तात्पुरते सर्वोच्च नेते म्हणून नियुक्ती करण्यात आली आहे. इराणच्या सरकारी वृत्तसंस्थेने या वृत्ताला दुजोरा दिला असून, नवीन सर्वोच्च नेत्याची रीतसर निवड होईपर्यंत अराफी देशाची धुरा सांभाळतील.
इराणच्या संविधानानुसार, सर्वोच्च नेत्याच्या मृत्यूनंतर एक अंतरिम नेतृत्व परिषद देशाचा कारभार पाहते. या परिषदेत इराणचे राष्ट्रपती मसूद पजेश्कियन, मुख्य न्यायाधीश गुलाम होसैनी मोहसेनी एजेइ आणि गार्जियन कौन्सिलचे प्रतिनिधी म्हणून धर्मतज्ज्ञ अयातुल्ला अराफी यांचा समावेश करण्यात आला आहे. ही त्रिसदस्यीय परिषद सध्याच्या कठीण काळात देशाचे नेतृत्व करणार आहे. अराफी यांची फकीह म्हणजेच 'धर्मविद' सदस्य म्हणून निवड करण्यात आली असून, त्यांनी तात्पुरत्या स्वरूपात सर्वोच्च पदाची जबाबदारी स्वीकारली आहे.
८६ वर्षीय आयतुल्ला अली खामेनेई यांचा मृत्यू हा इराणसाठी मोठा धक्का आहे. अमेरिका आणि इस्रायलने केलेल्या संयुक्त लष्करी कारवाईत इराणमधील अनेक लष्करी तळ आणि सरकारी इमारतींना लक्ष्य करण्यात आले होते. या हल्ल्यात खामेनेई यांच्यासह काही वरिष्ठ लष्करी अधिकारीही मारले गेल्याचे वृत्त आहे. अमेरिकेचे राष्ट्राध्यक्ष डोनाल्ड ट्रम्प आणि इस्रायलचे पंतप्रधान बेंजामिन नेतन्याहू यांनी सर्वात आधी या मृत्यूची घोषणा केली होती, ज्याला नंतर इराणनेही अधिकृतपणे दुजोरा दिला.
सध्या इराण एका अत्यंत कठीण आणि ऐतिहासिक वळणावर उभा आहे. एका बाजूला बाह्य हल्ल्यांचे प्रचंड दडपण आहे, तर दुसरीकडे देशांतर्गत राजकीय अस्थिरता निर्माण होण्याची भीती आहे. अशा परिस्थितीत अयातुल्ला अराफी यांच्यासारख्या अनुभवी धर्मगुरूची नियुक्ती करून इराणने आपली संवैधानिक प्रक्रिया सुरू ठेवली आहे. नवीन सर्वोच्च नेत्याची निवड होईपर्यंत ही अंतरिम परिषद इराणच्या धोरणात्मक निर्णयांची जबाबदारी घेणार आहे. संपूर्ण जगाचे लक्ष आता इराणच्या पुढील पाऊलांकडे आणि अराफी यांच्या नेतृत्वाकडे लागले आहे.
