इराण युद्धामुळे ग्लासातील बिअर होणार गरम!

नवी दिल्ली : इराण युद्धामुळे निर्माण झालेल्या जागतिक गॅस टंचाईचा मोठा फटका आता भारतातील बिअर उद्योगाला बसू लागला आहे. गॅस टंचाईमुळे काचेच्या बाटल्यांच्या उत्पादनात घट होऊन त्यांच्या किमती वाढल्या आहेत, तर आंतरराष्ट्रीय मालवाहतुकीतील अडथळ्यांमुळे अ‍ॅल्युमिनियम कॅनच्या आयातीवरही परिणाम झाला आहे. या पार्श्वभूमीवर, भारतात कार्यरत असलेल्या आघाडीच्या जागतिक बिअर उत्पादकांनी किमतीत वाढ आणि पुरवठ्यात व्यत्यय येण्याचा गंभीर इशारा दिला आहे.

भारत हा नैसर्गिक वायूचा जगातील चौथा सर्वात मोठा आयातदार असून, आपल्या एकूण गरजेपैकी सुमारे ४० टक्के गॅस कतारमधून आयात केला जातो. मात्र, इराणच्या हल्ल्यांमुळे कतारची निर्यात क्षमता अंशतः विस्कळीत झाली असून, याचा थेट परिणाम भारतीय काच उत्पादक कंपन्यांवर झाला आहे. काचेच्या भट्ट्या आणि उत्पादन लाईन्स चालू ठेवण्यासाठी गॅसची नितांत गरज असते, मात्र टंचाईमुळे अनेक कंपन्यांना आपले कामकाज थांबवावे लागले आहे.

पॅकेजिंग साहित्यातील दरवाढ आणि मागणी

ब्रुअर्स असोसिएशन ऑफ इंडियाच्या माहितीनुसार, काचेच्या बाटल्यांच्या किमतीत सुमारे २० टक्क्यांनी वाढ झाली आहे. याशिवाय, पुठ्ठ्याचे खोके, लेबले आणि टेप यांसारख्या इतर पॅकेजिंग साहित्याचे दर चक्क दुप्पट झाले आहेत. नेमक्या उन्हाळ्याच्या हंगामात, जेव्हा बिअरची मागणी सर्वोच्च असते, तेव्हाच अ‍ॅल्युमिनियम कॅन आणि बाटल्यांच्या तुटवड्याचे संकट ओढवले आहे. यामुळे उत्पादकांनी किमतीत १२ ते १५ टक्क्यांची वाढ करण्याची मागणी केली आहे.

भारताचा बिअर बाजार २०२४ मध्ये ७.८ अब्ज डॉलरचा होता आणि २०३० पर्यंत तो दुप्पट होण्याची अपेक्षा आहे. मात्र, सध्याच्या युद्धजन्य परिस्थितीमुळे वाढत्या उत्पादन खर्चामुळे उद्योग टिकवून ठेवणे कठीण होत असल्याचे असोसिएशनचे महासंचालक विनोद गिरी यांनी सांगितले. काही लहान कंपन्या जसे की बिरा आणि सिम्बा यांनाही या जागतिक पेचप्रसंगाचा फटका बसण्याची शक्यता आहे.