होर्मुझ सामुद्रधुनीत स्फोटकांचा धोका : इराण
तेहरान : मध्यपूर्वेत नुकताच जाहीर झालेला दोन आठवड्यांचा युद्धविराम (ceasefire) पुन्हा धोक्यात आला आहे. इस्रायलने लेबनॉनवर केलेल्या ताज्या हवाई हल्ल्यांमुळे परिस्थिती अधिकच चिघळली आहे. या हल्ल्यांत किमान २५४ ठार तर १,१०० हून अधिक जखमी झाले आहेत.
इस्रायलच्या (Israel) कारवाईनंतर इराण-समर्थित हिझबुल्लाहनेही प्रत्युत्तरादाखल इस्रायलवर हल्ले चढवले. त्यामुळे संघर्ष पुन्हा तीव्र होण्याची चिन्हे दिसत आहेत. इस्रायलने मात्र स्पष्ट केले आहे की, लेबनॉनमधील हिझबुल्लाहविरोधातील कारवाई युद्धविरामाच्या कक्षेत येत नाही. याउलट मध्यस्थी करणाऱ्या पाकिस्तानने युद्धविराम लेबनॉनपर्यंत लागू असल्याचे म्हटले आहे.
फ्रान्स, ब्रिटन, चीनसह अनेक देशांकडून हल्ल्यांचा निषेध
दरम्यान, अमेरिका आणि इराण यांच्यातील प्रस्तावित चर्चांपूर्वी वॉशिंग्टनने इराणच्या काही अटींना विरोध दर्शवला आहे. ज्यामुळे तणाव आणखी वाढण्याची शक्यता आहे. फ्रान्स (France), ब्रिटन आणि चीनसह (China) अनेक देशांनी इस्रायलच्या हल्ल्यांचा निषेध केला आहे.
होर्मुझ सामुद्रधुनीत स्फोटकांचा धोका : इराण
याच पार्श्वभूमीवर, इराणने होर्मुझ सामुद्रधुनीत (Strait of Hormuz) स्फोटकांचा धोका असल्याचे सांगत जहाजांसाठी पर्यायी मार्ग जाहीर केले आहेत. ही सामुद्रधुनी जागतिक तेलवाहतुकीसाठी अत्यंत महत्त्वाची मानली जाते, त्यामुळे या भागातील कोणतीही अस्थिरता जागतिक अर्थव्यवस्थेवर परिणाम करू शकते.
संपूर्ण परिस्थिती पाहता, मध्यपूर्वेत पुन्हा एकदा मोठ्या संघर्षाची शक्यता निर्माण झाली असून, आंतरराष्ट्रीय समुदायाचे लक्ष या घडामोडींवर केंद्रीत झाले आहे.
