कोलकाता : पश्चिम बंगाल विधानसभा निवडणुकीची मतमोजणी आज अत्यंत चुरशीच्या वातावरणात सुरू झाली आहे. राज्याचा राजकीय इतिहास आणि मतमोजणीदरम्यान होणारी संभाव्य संवेदनशीलता लक्षात घेऊन कोलकाता पोलिसांनी शहरात विजय मिरवणुका, रॅली आणि सार्वजनिक जल्लोषावर कडक बंदी घातली आहे. कायदा-सुव्यवस्था आणि शांतता राखण्यासाठी पोलीसांनी हा महत्त्वपूर्ण आदेश जारी केला आहे.
कोलकाता पोलीस आयुक्तालयाने प्रसिद्ध केलेल्या अधिसूचनेनुसार, ४ मे २०२६ रोजी निवडणूक निकालांशी संबंधित कोणत्याही प्रकारची मिरवणूक किंवा सार्वजनिक उत्सव साजरा करण्यास सक्त मनाई आहे. हा आदेश कोणत्याही एका पक्षासाठी नसून, सर्व राजकीय पक्ष आणि गटांना समान रीतीने लागू असेल. मतमोजणी प्रक्रिया पूर्ण होईपर्यंत आणि निकाल जाहीर झाल्यानंतरही शहरात तणाव निर्माण होऊ नये, हा यामागचा मुख्य उद्देश आहे.
पोलिसांनी स्पष्ट केले आहे की, जर कोणी या आदेशाचे उल्लंघन केले, तर त्यांच्यावर संबंधित कायद्यानुसार कठोर कायदेशीर कारवाई केली जाईल. शहरातील सर्व पोलीस ठाण्यांच्या प्रभारींना सतर्क राहण्याचे आणि या नियमाचे काटेकोरपणे पालन होईल याची खात्री करण्याचे निर्देश देण्यात आले आहेत.
जल्लोषासाठी पोलिसांनी एक खिडकी उघडी ठेवली आहे. ५ मे २०२६ किंवा त्यानंतर विजय मिरवणुका काढायच्या असल्यास, संबंधित पोलीस ठाण्याच्या प्रभारींची पूर्वपरवानगी घेणे अनिवार्य असेल. परवानगी मिळालेल्या मिरवणुकांनाही प्रशासनाने आखून दिलेल्या अटी व नियमांचे पालन करावे लागणार आहे.
२ वाजेपर्यंत पश्चिम बंगालमध्ये मोठी राजकीय उलथापालथ पाहायला मिळत आहे. भाजप १९० जागांवर आघाडी घेत बहुमताच्या आकड्याच्या पुढे दिसत आहे, तर सत्ताधारी तृणमूल काँग्रेस ९३ जागांवर आघाडीवर आहे.
राज्यातील २९३ मतदारसंघांसाठी निवडणूक आयोगाने ४३२ मतमोजणी अधिकारी नियुक्त केले आहेत. कोलकाता येथील ७ मतमोजणी केंद्रांवरील २२ स्ट्राँग रूम्सची सुरक्षा निमलष्करी दल आणि कोलकाता पोलिसांच्या ६० सशस्त्र जवानांकडे सोपवण्यात आली आहे. उत्तर आणि दक्षिण २४ परगणा यांसारख्या संवेदनशील जिल्ह्यांमध्येही मोठ्या प्रमाणावर निरीक्षक तैनात करण्यात आले आहेत.
