केंद्र सरकारकडून बढती आदेशांची फेररचना
पणजी : केंद्र सरकारने आयएएस कॅडरमधील बढती आदेशांची फेररचना केल्यामुळे, २०१६ मध्ये गोवा नागरी सेवेतून स्वेच्छानिवृत्ती घेतलेले अधिकारी एल्विस गोम्स यांचा आता आयएएस कॅडरमध्ये समावेश करण्यात आला आहे. मात्र, आपल्याला २०१५ ऐवजी २०१३ पासून आयएएस दर्जा लागू व्हावा, या मागणीवर ते ठाम आहेत.
केंद्र सरकारने बढती आदेशात फेरबदल करून गोम्स यांचा २०१५ च्या यादीत आयएएस कॅडरमध्ये समावेश केला आहे. मात्र, २०१३ मध्ये स्वतःपेक्षा कनिष्ठ अधिकाऱ्याला आयएएस पदोन्नती देण्यात आल्याने त्यांनी उच्च न्यायालयात याचिका दाखल केली होती. त्यानंतर २०१६ मध्ये त्यांनी राजकारणात प्रवेश करण्यासाठी स्वेच्छानिवृत्ती घेतली आणि त्याच वर्षी त्यांना आयएएस दर्जाही मिळाला होता.
वरिष्ठतेनुसार आयएएस बढतीचा दर्जा २०१३ पासून लागू व्हायला हवा, या मागणीसाठी त्यांनी उच्च न्यायालयातील आपला कायदेशीर लढा सुरूच ठेवला आहे. आता केंद्र सरकारने हा दर्जा २०१५ पासून लागू केला असला तरी, तो २०१३ पासून लागू करण्यात यावा, असे त्यांचे म्हणणे आहे.
“माझा हक्क २०१३ पासूनचा असून त्यासाठी माझा लढा सुरू आहे. माझ्यापेक्षा कनिष्ठ असलेल्या अरविंद देसाई यांना जबरदस्तीने आयएएस बढती देण्यात आली. उच्च न्यायालयाने हस्तक्षेप केल्यानंतर प्रकरण माझ्या बाजूने गेले.”
